പഞ്ചാബ് കിങ്‌സ്-സണ്‍റൈസേഴ്‌സ് ഹൈദരാബാദ് മത്സരത്തിനിടെ ഗാലറിയില്‍ നടന്ന ഒരു സംഭവത്തിന്റെ വീഡിയോയാണ് ഇപ്പോള്‍ വൈറലാകുന്നത്.
തന്നെ ഫോക്കസ് ചെയ്യാന്‍ ശ്രമിച്ച കാമറാമാനോട് സണ്‍റൈസേഴ്‌സ് ഉടമ കാവ്യ മാരന്‍ ചൂടാകുന്ന വീഡിയോയാണ് സോഷ്യല്‍ മീഡിയയില്‍ വ്യാപകമായി പ്രചരിക്കുന്നത്.
പഞ്ചാബ് ബാറ്റിങ്ങിനിടെ ക്യാപ്റ്റന്‍ ശിഖര്‍ ധവാന്‍ സിക്‌സടിച്ചപ്പോഴാണ് കാമറ ഗാലറിയിലേക്കു തിരിഞ്ഞത്. ഗാലറിയിലുണ്ടായിരുന്നു കാവ്യ മാരന്റെ പ്രതികരണം പകര്‍ത്താനായിരുന്നു കാമറാമാന്റെ നീക്കം.
അങ്ങോട്ട് മാറുവെന്ന് കാമറാമാനോട് കാവ്യ പറയുന്നതിന്റെയും അസ്വസ്ഥയാകുന്നതിന്റേയും ദൃശ്യങ്ങളാണ് സാമൂഹ്യമാധ്യമങ്ങളില്‍ വൈറലാകുന്നത്.
കാമറാമാന്‍ തുടര്‍ച്ചയായി തന്റെ ദൃശ്യങ്ങള്‍ പകര്‍ത്തിയതാണ് കാവ്യയെ ചൊടിപ്പിച്ചത്. കഴിഞ്ഞ ദിവസം ഹൈദരാബാദിന്റെ വിക്കറ്റ് നേട്ടം ആഘോഷിച്ചു തുള്ളിച്ചാടുന്ന കാവ്യയുടെ ദൃശ്യങ്ങളും വൈറലായിരുന്നു.
ഹൈദരാബാദിന്റെ മത്സരങ്ങള്‍ നടക്കുമ്പോള്‍ കാവ്യ മാരന്‍ സ്ഥിരമായി ഗാലറിയിലുണ്ടാകും. കാവ്യയുടെ പ്രതികരണങ്ങള്‍ ഇതിനു മുന്‍പും ചര്‍ച്ചയായിട്ടുണ്ട്.
സണ്‍ ഗ്രൂപ്പ് ഉടമ കലാനിധി മാരന്റെ മകളാണു കാവ്യ മാരന്‍. സീസണിലെ ആദ്യ വിജയമാണ് പഞ്ചാബിനെതിരേ സണ്‍റൈസേഴ്‌സ് ഹൈദരാബാദ് നേടിയത്.
